19 Jul 2013

Bahan Sermon tu Minggu VIII dung Trinitatis, 21 Juli 2013


Johannes 15 : 9 – 17
Masihaholongan

           Tujuan, latar belakang dohot teologi ni turpuk
          Ra, hata “holong” i ma hata na jumotjot itabege di ngolunta songon siihuthon Kristus hita. Jala memang, boi dohononta i do unok ni na tahaporseai di haroro ni Kristus manopot portibi on. Na mamboan holong ni Debata Ama do Ibana, jala Ibana sandiri do Holong i na ro sian ginjang. Holong na sian ginjang i masuk do i tu hahomion ni Kristus (misteri Kristus), jala barita nauli na sinurat ni si Johannes on marisihon Hata ni Debata sandiri na mangungkap hapapatar ni Holong i, Kristus Anak ni Debata i. I do tujuan ni Injil Johannes on, naeng patandahon Kristus Jesus Anak ni Debata na ro papatarhon holong na sian ginjang di bagasan ngoluNa sahat tu panghophoponNa paluahon na porsea.
           
            Tafsiran ni turpuk dohot sipahusorhusoron
Marhitehite panghophopon ni Kristus Anak ni Debata, patar ma holong ni Debata tu jolma angka na porsea. Di angka na manjangkon panghophopon i, gok mauliate do rohana jala Kristus nama nampuna dirina. Molo didok Kristus i nampuna diri ni sahalak na porsea, ingkon mangolu ma di bagasan Ibana. Mangolu di bagasan Kristus na marlapatan do i ingkon mangihuthon angka ajaranNa. Jala ingkon di bagasan parsitutuon ni roha do na manghangoluhon HataNa i. Siala hangoluan do Hata ni Debata.

1.      Holong ni Kristus sitiruon ni jolma
            Holong do roha ni Debata Ama di Jesus Kristus AnakNa (ida Mrk. 1:11), songon i do holong ni Kristus tu angka jolma (ayat 9). Tutu, na mardosa do angka jolma di portibi on jala saor tu hajahaton do ngoluna, jala tu hamatean do langkana. Alai ndang munsat holong ni Debata sian tano on, jala ndada jolma i diporangi Debata, alai dosa, hajahaton dohot hamatean i do. Alani i do disuru AnakNa tumopot portibi on, mamaritahon Harajaon ni Debata (Syalom), mamboan haluaon na manaluhon hamatean marhitehite hamamateNa sandiri. I ma holong ni Kristus, holong do rohaNa mida jolma alai dihasogohon do hadosaonna. Sitiruanta do on, asa molo adong na mambahen na so denggan tu hita, ndada diri ni sibahen na jat i sihasogohon, na binahenna i do. Anggo tu jolmana i siasian do tahe i, ala so malua dope sian ulaon na jat jala ndang mangolu di bagasan holong ni Kristus.

2.      Mian di bagasan holong ni Kristus halalas ni roha do i
            Sihamauliatehononhon do asi dohot holong ni roha ni Debata marhite Kristus Jesus. Dipauba do hadosaon gabe habadiaon, parhatobanon ni dosa gabe haluaon, arsak ni roha gabe halalas ni roha. Songon jamita di piga minggu naung salpu, molo disalpuhon utang, tontu sahali manghorhon las ni roha do i tu parsingiran i. Songon i ma nang jolma pardosa na manjangkon Kristus Jesus gabe Sipalua di ibana, dipalua do sian dosa, hajahaton dohot hamatean. Panghorhon ni i, iluilu gabe halalas ni roha (ayat 11).
Didok di ginjang, ndada jolma i musu ni Debata, hajahatonna i do, dosana i. Alai molo dung dipalua na porsea i, ingkon rap jongjong ma nian dohot Tuhan Jesus mangalo dosa dohot hajahaton i. Songon dia ma dalanna? I ma marhitehite na mangaradoti patik (ayat 10). Mian di bagasan holong ni Kristus, tuntutanna i ma mangaradoti patikNa. Dibahen i, ingkon gabe parangan ni Kristus do angka na porsea na pinalua i, jongjong di jolo mangalo dosa dohot hajahaton. Sialoon do dosa dohot hajahaton, na di diri sandiri pe i nang di diri ni dongan.

3.      Mangolu di bagasan holong ni Kristus mangonjar na porsea masihaholongan
Tindakan na mangaradoti patik, sadalan do i dohot tindakan na marholong ni roha. Ai hagogok ni saluhut patik do tindakan na manghaholongi dongan (ida Gal. 5:14). Boasa didok hagogok ni saluhut patik holong i? Mangihuthon pemahaman na di ginjang, dos do sude jolma i dihaholongi Debata, dihophop Tuhan Jesus do sude (nang pe holan angka na manjangkon Ibana do na taruli haluaon), alani i ndang adong dalan ni jolma laho marsogo ni roha tu donganna jolma. Ai na rap pardosa do, nang pe naung pinalua, alai nda tung adong na boi menjamin dirina ndang be mangulahon dosa. I do umbahen ingkon tiruanta do holong ni Kristus i, na so manghasogohon jolma alai dosa dohot hajahaton ni jolma i do na dihasogohon rohaNa. Anggo jolma i, tama do masihaholongan jala masipaingotan di angka na humurang asa rap denggan sude jala mian di bagasan holong ni Kristus (ayat 12). Jala di ayat 13 dilehon do tu na porsea sitiruan songon hataridaan ni holong na umbagas, i ma na sahat tu na sumeahon diri.

4.      Aleale ni Kristus, sitean hahomion ni Debata
            Digoar Tuhan Jesus do angka na porsea i songon alealeNa, na umboto saluhut naung pinabotohonNa (ayat 14-15). Naeng dohonon sian i, ndada holan barita sambing na sahat tu angka na porsea i, alai nunga secara langsung dialami holong ni Debata marhite Kristus AnakNa i. Lumobi do pangantusion na nidapot marhitehite na mengalami martimbangkon na holan mambege barita/mananda secara lisan/tulisan. Jala angka na porsea i nunga dialami sandiri holong ni Kristus i marhitehite haluaon na pinatupaNa i. Homi (misteri) do pangalaho ni pangantusion i, jala ndang sai tarungkap marhite hata. Alai marhitehite pamujion di bagasan parmingguon boi do nitangkup pangantusion i sian liturgi Agenda. Bagian-bagian ni liturgi i naeng patorangkon tu angka na porsea taringot tu hinauli jala hinabagas ni holong ni Debata. Na ro hita tu parmingguon i, na niontang Debata do hita. Anggo sian hadirionta na sai mardosai, ndang talup hita mandonoki Na Sun Badia. Alai marhite Kristus na gabe Dalan, boi do hita taruli di parsaoran dohot Debata. Pengalaman on, i do gabe barita siboanonta di bagasan hata dohot pambahenan (parange) na patandahon paboa naung pinalua do hita, naung diperlayakkan gabe bangso ni Debata na badia.

5.      Mangolu di bagasan holong ni Kristus mamparbuehon holong tu dongan jolma
Marhitehite pengalaman akan kasih Allah, borhat do hita tu tongatonga ni portibi on laos taboan do barita haholongon i tu angka dongan jolma. Tarpillit do hita angka na porsea gabe siboan barita halongangan i, hoholongon dohot haluaon i (ayat 16). Jala ndada hita na mamillit dirinta sandiri, alai Tuhan i do. Na di tanggal 1 – 4 Juli na salpu, dipatupa do ujian penerimaan murid baru di STT-HKBP, jala di tanggal 4 do pengumumanna. Adong ma disi angka na mandohoti ujian na dipaksa natorasna, na so pos rohana di ujian laho masuk tu perguruan tinggi negeri naung parjolo nidohotanna, na taronjar sian rohana sandiri, manang naung loja manganggur. Nang pe panitia penerimaan do na mengkoreksi ujian i, alai haputusan tertinggi di Debata do. Manang na songon dia pe latar belakang na mangonjar angka na mandohoti ujian i, guru di pamilliton ni Debata do. Songon i nang hita marhite sian turpuk ni jamita on, ingkon unduk do hita di pamilliton i gabe siboan barita haholongon marhitehite na masihaholongan sama hita.
Alai tutu, ingkon sian bulus ni roha do na mangulahon holong i, asa mian tutu parbuena i, lapatanna ndang magopo. Molo so sian habuluson ni roha, porsea ma hita ndang na manahan parbue ni i. Alani, tung nalnal jala tangkas do Hata ni Tuhan Jesus di turpuk on di bagasan parenta na sederhana alai mansai bagas jala uli: “Masihaholongan ma hamu!” (ayat 17).

oooOOOOooo

 pdt.mop/serm.ress.sipirok/binanga2013

Tidak ada komentar:

Posting Komentar

Apa yang kita tulis merupakan apa yang kita katakan. Apa yang kita katakan keluar dari hati. Silakan berkata-kata dengan hati, sopan dan santun.