6 Jul 2013

Bahan Jamita Minggu 6 dung Trinitatis 7 Juli 2013

Kolosse 4 : 1 – 6
Mangolu dibagasan holong dohot habisuhon

            Tujuan dohot latar belakang ni Surat Kolosse
            Ia surat ni apostel Paulus na mandapothon halak Kolosse on, digurithon do dohot tujuan laho pahothon haporseaon. Ringkot situtu do panogunoguon di halak Kristen na di Kolosse siala adong dapot angka poda na lipe di humaliang nasida. Di bindu 2:8 didok, “Jaga ma hamu, so tung diago deba hamu marhitehite hata bisukbisuk dohot hata lensem na so marimpola, hombar tu tonatona ni jolma, mangihuthon sisiasia ni hasiangan on, ndada mangihuthon Kristus.” Hape na harmonis do nian parsaoran ni angka na porsea disi jala denggan do pangulahonon ni haporseaonna (ida bindu 1 : 4 + 6 dohot ayat na sesuai). Dibahen i, asa unang sanga masuk angka ajaran na sala tu haporseaonnasida, ditongos apostel Paulus ma surat on. Adong pigapiga topik na gabe perhatian ni surat on, alai di turpuknta tung ondol do ngolu partangiangon dohot dampak ni ngolu partangiangon i paulihon parsaoran.

            Teologi ni turpuk
            Teologi umum ni surat Kolosse i ma credo manang na pengakuan iman taringot tu hasurungan ni Kristus. Ibana do suman ni Debata na so tarida i, na parjolo tubu sian nasa na tinompa (1:15); marhitehite Ibana ditompa saluhutna na adong jala marhapatean tu Ibana do saluhutna (1:16); Ibana do di jolo ni saluhutna, jala saluhutna i do hot di bagasan Ibana (1:17); Ibana do ulu ni huria i (1:18). Dimulai surat on do mamaritahon hasurungan ni Kristus, jala dipaujung dohot penegasan Ibana do ulu ni huria i. Dihangkam credo i do hadirion ni Kristus sahat tu kehadiranNa (eksistensi) di tongatonga ni portibi on. Naeng dohononna sian i, Kristus i do nampuna saluhut nasa na adong, Ibana do Raja, jala di huria i Ibana do uluna. Alani, ngolu ni angka na porsea (huria i) ingkon do marojahan tu karya ni Kristus, jala ndang boi masa sinkretisme, i ma paham na padomudomuhon angka poda. Halak naung tinobus, jala naung mate jala dipahehe rap dohot Kristus (ida 2:12), tama do mangolu di bagasan Ibana.

            Tafsiran ni turpuk
Pertanggungjawaban ni na porsea tu Debata
            Ngolu ni halak Kristen ingkon do dipertanggungjawabkan tu Debata, nang tuan ibana nang hatoban pe. Tarlumobi di angka tuan, angka induk, ingkon do mangulahon na tigor jala na tama maradophon angka anak somang (ayat 1). Tardok pe anak somang, manang na hamba di Alkitab, alai ro di Tuhan Jesus do saluhutna i. Ndang boi dohonon ni angka induk, na milikna do angka anak somang i gabe marlomolomo ni roha (sewenang-wenang). Ingkon rajumanna do, na sahat pe ibana gabe induk di angka anak somangna, na sian Debata do i, jala tong do Debata nampuna ngoluna dohot sude nasa na di ibana. Na marlapatan, ibana pe anak somang do di Debata, Tuhanna. Alani, ingkon patupaonna do na tigor jala na tama, ai i do peleanna tu Debata.

Relasi ni na porsea tu Debata manontuhon relasina tu dongan jolma
            Na pajongjong hatigoran dohot mangulahon na tama, i do na targoar holong, tarlumobi maradophon dongan na gumale. Tarida ma sian i hubungan (relasi) ni jolma tu Debata marpanghorhon tu hubungan ni jolma tu donganna. Hubungan ni na porsea tu Debata tarida do sian ngolu partangiangonna. Marhitehite na martangiang do jolma i manjaga parsaoranna tu Debata, jala marhitehite partangiangon i Debata mangontang jolma tu parsaoran tu DiriNa. Di bagasan parsaoran na denggan (jala rosu) tu Debata boi do mangurupi na porsea i asa sai dungo haporseaonna, lumobi ma na mangadopi angka ajaran palsu di humaliangna na sai mangula mangalaokhon ajaran na pita na sian Tuhan Jesus.
Jala bagas do makna na terkandung di hata “mauliate” di ayat 2 i. Molo nidok mauliate tu dongan, na patandahon kesalingtergantungan do i jolma tu jolma na marsiurupan, relasi jolma tu donganna. Na mandok mauliate sahalak, na patutoru dirina do i. Songon i molo nidok mauliate tu Debata, na patutoru diri do i di adopanNa, na pasahathon diri jala na so ganggu rohana dina manghaporseai pangaramotion ni Debata (sihamauliatehononhon).

Sude halak porlu martangiang jala masitangiangan
Sude do halak, lumobi angka na porsea (disadari manang na so disadari), mangharingkothon dukungan marhite tangiang sian donganna sahaporseaon. Songon i nang apostel Paulus na mangido dukungan marhite tangiang sian angka na porsea di Kolosse taringot tu panghobasionna (ayat 3-4). Ndada holan tu tangiangna sandiri apostel Paulus marpos ni roha, alai di tangiang ni donganna pe pos do rohana ditangihon Debata, lumobi ma pelayananna do dipangidohon ibana asa ditangiangkon. Jesus Kristus Anak ni Debata, Ibana do Raja di saluhutna jala ro di Ibana do saluhut nasa na adong, dibahen i ndang ganggu roha ni apostel Paulus, tangiang ni manang ise pe ditangihon Tuhan Jesus do i, ala ruas ni Tuhan i do nang angka dongan na asing na sahaporseaon. Lumobi ma muse denggan do barita ni angka na porsea na di Kolosse manghangoluhon haporseaonna (ida bindu 1 : 4 + 6). Dibahen i, songon na ginurithon di poin na di ginjang: relasi manang parsaoran tu Debata manontuhon parsaoran tu dongan jolma.

Ngolu partangiangon mangalehon habisuhon na paulihon karakter hakristenon
            “Manongtong ma hamu martangiang” didok di surat on. Manongtong (Alkitab: bertekunlah) lapatanna ndang mansadi jala diulahon di bagasan angka tingki na taratur. Manongtong martangiang (bertekun dalam doa) i do sasintongna na paulihon ngolu partondion manang spiritualitas kristiani. Jala tau paulihon parsaoran na rosu tu Debata do ngolu partangiangon dohot tangiang na dihangoluhon. Tung balga do pasupasuna molo mian na porsea i di bagasan parsaoran na rosu tu Debata. Di gombarhon do mansai uli panghorhon ni parsaoran sisongon i di Psalmen 51:8, “Sintong ni roha di bagasan do tongon lomo ni rohaM, antong pabotohon ma habisuhon tu bagasan rohangku” (Sesungguhnya, Engkau berkenan akan kebenaran dalam batin, dan dengan diam-diam Engkau memberitahukan hikmat kepadaku). Di bagasan parsaoran i, “dihusiphon” do habisuhon tu na porsea i. Habisuhon i ma na mangisi gerak hidup ni na porsea, di bagasan parange (perilaku) nang hatana na marimpola (na siniraan, bergaram dan tidak hambar/kosong) (ayat 5-6).
            I do dalanna dipodahon apostel Paulus asa marpantas ni roha dina marparange angka na porsea i, lumobi maradophon halak na asing (di balian ni parpunguan ni halak Kristen). Barita nauli do i tu portibi on, molo pantas marparange na porsea i, jala ingkon pinataridahon do i di ganup “tingki.” Tingki dison lapatanna peluang manang kesempatan, dibahen i ingkon tanggap do na porsea i di tingki adong peluang manang kesempatan mamaritahon barita nauli marhite parange tu halak na asing. Songon i nang di panghataion, ingkon sai tongtong lambok jala marimpola. I do habisuhon.

Sipahusorhusoron
            Di Minggu paonomhon dung Trinitatis on, naeng idaonta jala sunggulanta muse panandaon tu Kristus nampuna saluhut nasa na adong di portibi on. Marhitehite Ibana do ditompa saluhut angka na tinompa (patudos tu pamuhaion ni Injil Johannes di bindu 1 : 3 + 10). Molo naeng hita mangolu dibagasan holong dohot habisuhon, taihuthon ma Jesus. Mangihuthon Jesus lapatanna mangolu di bagasan pangajaranNa.
            Sian bahan sermon on, tapahembang ma tu implikasina siulaon secara konkret di tongatonga ni parsaoran di huria nang di tongatonga ni masyarakat. Di kesempatan on binahen do sirenungkononta songon na tarsurat di toru on:
1.      Boha do pajongjong hatigoran (kejujuran) dohot mangulahon na tama maradophon dongan jolma, lumobi tu na gumale. Boi do gotapon hak ni, isarana, na mangula tu iba (anak somang), songon gaji rupani? Manang boi do patuhukon ulaon na lobi sian gogo ni i? Songon i nang di tongatonga ni bagas, boi do marlomolomo (sewenang-wenang) sahalak ama tu anggota keluargana?
2.      Boha do ngolu partangiangonta? Dungo do haporseaonta i, manang na modom do? Jala taulahon do na masitangiangan i?
3.      Boha do pamangkeonta di tingki na pinasahat ni Debata tu hita, lumobi di angka peluang dohot kesempatan patuduhon parbue ni haporseaon? Boha do parsaoranta di tongatonga ni masyarakat? Adong do holong dohot habisuhon di ngolunta?

oooOOOOooo


 pdt.mop/serm.ress.sosa/binanga2013

Tidak ada komentar:

Posting Komentar

Apa yang kita tulis merupakan apa yang kita katakan. Apa yang kita katakan keluar dari hati. Silakan berkata-kata dengan hati, sopan dan santun.