18 Nov 2014

Jamita Minggu, Tanggal 9, 16, 23, 30 November 2014

Sermon HKBP Ressort Sion Nauli Sosa
Jumat, 07 November 2014, di HKBP Sibuhuan

Minggu XXI dung Trinitatis, 09 November 2014

Mateus 25 : 1 – 13
Boan ma parpalitoan dohot miak

Patujolo

Sai martangiangi do halak Kristen di portibi on dohot tangiang hatopan i: “…sai ro ma harajaonMu…” Sada fakta: ndang sude halak Kristen di portibi on mananda panindangion ni haporseaon ni angka apostel (pengakuan iman rasuli), alai ianggo tangiang hatopan i, Tangiang Ale Amanami, sude do mananda, ai tarsurat do i  di Bibel songon tangiang na niajarhon ni Tuhan Jesus tu angka siseanNa (Mat. 6:9 du). Alai beha do panghangoluhonon ni isi ni tangiang i, tarlumobi di ponggol na nienet di ginjang?
Songon i ma Injil (Barita na Uli na sinurat ni si) Mateus on, patoranghon tangiang i marhitehite jamita ni manang na pangajarion ni Tuhan Jesus. Di turpuk on, “harajaonMu” di isi ni tangiang i gabe “harajaon banua ginjang.” Dos ianggo makna ni tangiang “sai ro ma harajaonMu” dohot barita taringot tu harajaon banua ginjang, na patuduhon panghirimon ni angka na porsea di hamamasa ni paruhuman ni Debata. Na martudutudu tu ari na parpudi, dina masa panirangon ni angka na porsea sian angka na so porsea, jala masa ma disi paruhuman. Jala huhut marisihon padan do i di hasisingkop ni haluaon di angka na porsea. Malua ma angka na porsea i sian nasa parniahapanna di hasiangan on.

Hatorangan ni turpuk

Sian na sinurathon di ginjang, barita harajaon banua ginjang na binoan ni Tuhan Jesus marisihon taringot tu ari parpudi, hasisingkop ni haluaon di angka na porsea dohot uhum tu angka na so porsea. Dilumbahon do tu angka jolma taringot tu ari na parpudi on, asa mangarade angka jolma manomunomu. Ise na hobas, parsidohot do tu banua ginjang, ise na so hobas tading ma. Dijamitahon Tuhan Jesus do on marhite na mamangke sada parumpamaan, sampulu anak boru na masiboan palitona be laho manomunomu pangoli na naeng ro manopot nasida.

Anak boru, palito dohot miak

Adong sampulu anak boru na masiboan palitona be laho manomunomu pangoli na naeng ro. Alai adong perbedaanna, na lima mamboan miak na limanari ndang. Ala ni lelengna pangoli i ndang marnaro gabe tarpodom ma nasida. Dung adong na joujou paboahon na ro ma pangoli i, tarsunggul be ma sude alai tarsonggot ma angka na oto i ala so adong be miak di lampuna. Dipangido ma sian na limanari na mamboan miak, hape ndang dilehon. Di tingki laho nasida manuhor, apala disi ma ro pangoli i gabe so dohot be nasida tu hasampuran rea i.
Ia anak boru na nidokna di turpuk on, i ma halak Kristen. Palito i ma panghirimonna manang pangaradeonna dohot miak i ma haporseaon. Ingkon tongtong do galak palito i asa marguna, i ma tandana panghirimon na mangolu, jala ala ni i ringkot situtu do miak ala i do na pagalakhon, haporseaon i ma i. Pangoli i ma Kristus, na naeng ro paduahalihon laho mangalap angka na gabe jambarNa i ma angka na porsea di Ibana.

Boasa ndang dilehon tu nasida miak i?

Dung na tarsunggul nasida na sampulu anak boru i, dalan pintas do dibuat angka anak boru na oto i, mangido miak ni palito tu donganna. Hape adong hian do tingki di nasida laho paturehon i, hape ndang diparhaseang nasida tingki i. Sai songon na egois do na limanari anak boru i na so olo mangalehon miak persediaan i. Alai huhut realistis do pingkirannasida i, didok: “Ndang sae maon di hami dohot di hamu” ninna mangalusi angka donganna i. Sian i, justru anak boru na oto i do na egois, na so mamingkirhon aha do panghorhonna molo dijalonasida sian angka donganna i. Molo dijalo nasida miak ni palito sian donganna i mandok asa sarupa hurangan ma nasida maon. Hape nunga salpu be tingkina, naeng jumpang nama tingki haroro ni pangoli i. Di tingki so jumpang dope tingkina, disi do masipaleanan, alai molo dung jumpang tingkina ndang adong be tingki masipaleanan. Ai muse, molo italapati astuan ni parumpamaan on, ia miak i ma haporseaon, lapatanna kesiapan rohani do i. Siap sedia secara rohani bukanlah hal yang dapat dibagi-bagikan kepada orang lain, meskipun keadaan sudah sangat genting.

Boasa ndang diungkap pintu tu nasida?

Pargalak ni palito i do tanda na adong miak di bagasan palito i, laos i do nang tanda ni haradeon ni oroan laho pajumpang dohot pangoli. Molo so galak palitona, sian pangantusion di ginjang marlapatan do i na so adong miak di palitona i, na so adong ma haporseaona umbahen so adong panghirimon di haroro ni Tuhan. Itaboto do, holan angka na porsea i do parjambar di harajaon banua ginjang i. Angkup ni i muse, molo so galak palitona, tandana halak na lemba, na leas rohana dina paimahon haroro ni pangoli i. Ndang na so nilehon tingki laho paradehon diri, alai na so diparhaseang do. Molo diharingkothon, tontu sahali diparhaseang ma tingki na adong.

Panghirimon na rumar

Sian parumpamaan na binahen ni Tuhan Jesus on, gabe taboto do na rumar (kosong) do hape panghirimon ni na lima anak boru na oto i. Dohot do nian nasida paimaimahon pangoli i, hape gabe so marlapatan halojaonnasida i ala ni halembaon ni nasida, ala ni leas ni rohanasida. Songon i do nang na nidok ni turpuk Epistel na sian Amos 5:18-24, ndang dipardulihon Debata pelean ni bangso i nang pe diharinggashon nasida marminggu. Dia ma alana? Ala so diulahon nasida lomo ni roha ni Debata (pat. Amos 2:6). Marminggu pe nasida holan hasomalan sambing do hape, holan formalitas semata. Tung pe dihalungunhon nasida ari ni Tuhan i, hape sasintongna ari hagolapon do i di nasida, ndada ari hatiuron na paluahon. Songon i ma panghirimon ni anak boru na lima na oto di turpuk on, hamamagona do hape panghirimonna i ala so diradothon.

Hahonaan ni jamita

Pantas marroha

Hata na oto dohot na pantas marroha disi ndada tu ilmu pengetahuan lahona, alai tu habisuhon do. Ala ni i do umbahen na pantas marroha dibahen Tuhan Jesus panuhari ni na oto, ndada na pistar. Habisuhon ni na lima anak boru na pantas marroha i ma na mamparhaseang tingki di pangaradeonna, ndang dipansuasaehon. Songon dia do marhaseanghon tingki di bagasan kerangka na paimahon Tuhan i? Tingki parasian dope on, taparade ma saraderadena, unang mago haporseaonta i songon miak ni palitonta gabe so marpanghirimon be hita. Halak na manghirim i do na jumpangan, alai na marsitutu di panghirimonna i do ndada holan na manghirim na so haru diroha i: molo ro ba ro ma, molo so ro ba i pe taho (pat. Pang. 3:16). Halak na marsitutu manghirim i do na tutu manghaporseai Tuhan Jesus, na porsea di haroro ni Tuhan i paduahalihon.

Mangulahon hata ni Tuhan i do pangaradeon i

Songon dia do sasintongna rumang ni pangaradeon i? Pangaradeon i ma parholangan ni tingkinta saonari dohot tingki ni haroro ni Tuhan i. Lapatanna disi sada ruang waktu do i na ingkon diisi. Dohot aha ision? Songon halak na porsea hita, pangulahonon ni hata ni Tuhan ma na mangisi pangaradeonta i. Didok di Mat. 7:26, “Alai na umbege hatangki, hape ndang diulahon, i ma sipatudoson tu halak na oto, na paulihon bagasna di atas rihit.” Songon i nang sian turpuk Epistel na sian Amos 5:18-24 i, ndang dipardulihon Tuhan i pamujionta di GoarNa i, parsombaonta nang parminguonta on, ianggo so adong disi (di ngolunta) uhum dohot hatigoran. Marminggu hita alai huhut taulahon na dihagigihon Debata di angka ari na asing, marisuang do parmingguonta i jala mago soada do ngolunta i. “Sai ro ma harajaonMu” sai ninna hita di parmingguon i mandok tangiang i, sai hira na rap manghirim di haroro ni harajaon banua ginjang i hape di halak hatiuron do ari ni Tuhan hape di hita hagolapon do (pat. Amos 5:20, “Nda haholomon tongon ari ni Jahowa, jala ndada hatiuron hagolapon do, ndang marsinondang?”).

Sipahusorhusoron

1) Pantas ma hita marroha di tingki parasian on, asa malo hita jala marbisuk mangisi angka ari ni ngolunta i hombar tu lomo ni roha ni Tuhan, songon didok parpsalmen di Ps. 90:12, “Sai parrohai ma hami mamilangi angka ariarinami, asa dapotan roha na bisuk hami.”
2) Tapasiding ma nasa ulaon na mangarugihon di haporseaonta, gabe manghorhon dosa jala gabe parohon pangunjunan tu dirinta sandiri. Songon didok di Jak. 1:22, “Alai gabe siulahon Hata i ma hamu, unang holan pananginangi, angka na paotootohon dirina.”
3) Sai tongtong ma hita marsitutu ni roha manghirim di haroro ni harajaoan banua ginjang i di bagasan tangiang nang angka pambahenan pe. Ai parujungan ni nasa haporsuhonta do haroro ni harajaon banua ginjang i, haluaon di angka na porsea.

oooOOOOooo


Minggu XXII dung Trinitatis, 16 November 2014

Sepanya 1 : 7, 12 – 18
Lam jonok nama ari ni Tuhan i

Patujolo

Songon dia do panghilalaan ni halak na mandapot juara, di tingki detik-detik dina laho manjalo piala manang na piagam? Songon dia ma muse panghilalaan ni halak di detik-detik terakhir laho mandalani eksekusi hukuman mati? Na pasti ingkon las do roha ni halak na naeng manjalo penghargaan ala ni sadasada kesuksesanna. Alai suharsuharna do ianggo di halak na naeng manjalo balos ni pambahenanna na jahat i. Songon i ma nuaeng barita ni turpuk jamita on, sada lumbalumba asa mangarade saluhut halak mangadopi ari paruhuman ni Debata Jahowa. Tontu gok biar ma roha ni halak pardosa, alai las ma roha ni halak na porsea tu Debata jala na mangihuthon dalan ni Tuhan i.

Hatorangan ni turpuk

Di zaman ni raja Josia do panurirang Sepanya marhobasi. Hatiha i adong dope pasipasi ni panombaon tu Baal di Jerusalem songon na didok di ayat 4, i do sasaran ni jamita ni panurirang Sepanya. Nang pe raja na burju raja Josia, jala na mardalan di dalan ni Tuhan do ibana, alai ianggo di harajaonna i adong dope pasipasi ni parsombaon na tu Baal. Jala ala disi dope praktek parsombaon tu Baal, manang beha pe marpengaruh do i tu parsombaon ni halak Israel tu Debata, na torang didok di ayat 5, “huhut marmangmang tu Jahowa huhut marmangmang tu Malkom.” Angka on ma deba na gabe ro hata ni Debata tu panurirang Sepanya laho paingothon bangso i asa rade laho pasidinghon praktek-praktek parsombaon na sian bangso sileban (dibahen do kiasan ni on di ayat 8, “angka na marpahean na pulik luat”).

Kemerosotan iman

Nunga dipadiri Jahowa saluhutna na ringkot tu ari paruhumanNa i, jala nunga diparbadiai angka na pinioNa i di hamamasa ni paruhuman i. Ndang apala torang di turpuk on manang na ise na pinio ni Debata disi, alai na rumingkot botoon ni pangisi ni huta Jerusalem i ma nunga mangarade Tuhan i pamasahon paruhuman. Dibahen i, bangso i pe hohom ma paidaida na naeng masa di huta i tu nasida. Hohom lapatanna unang be adong na mangulahon angka na so marguna na so marlapatan tu ngolu haporseaonna. Di hariburon ni portibi taringot tu hamoraon, hasonangan na so manongtong i, hajahaton, dohot nasa ulaon hageduhon, di papulik bangso i ma dirina, morot ma sian i, mulak ma tu ngolu songon naung niaturhon ni Debata tu bangsoNa. Unang songon angka baoa na nidapot ni Tuhan i maon, na nalom roha di tuaknasida. Di Alkitab didok “orang-orang yang telah mengental seperti anggur di atas endapannya.” Ndang boi mengental anggur i, gabe so sempurna do parmasakna bahkan olo do sega. Ingkon dipahusor do i sian sada inganan tu inganan na asing asa sempurna parmasakna jala ndang mengendap. Na naeng dohononna disi, molo sai diula na jat maol do muse paubahon i, gabe karakter nama i. Dohot contoh na asing muse, sahali nioloan daging i malosok marminggu olo do i gabe kebiasaan, unangunang sogot gabe so arga be ari Minggu i dibahen. 

Jala olo do ala ni kemapanan ni ngolu (memiliki segala yang dibutuhkan dalam hidup) gabe so marsigantung be tu Debata, dimulai ma kemerosotan moral, pola sahat ro di na mandok: “Ndang adong na denggan, manang na jat bahenon ni Jahowa.” Dia do lapatan ni i? Na so mangula do Debata? Hape Debata na mangolu do Debata Jahowa, i do dihaporseai bangso Israel sian na robi pe. Na marlapatan ma i, ala ni i kemapanan hidup gabe diparsoada Debata, “boi do ahu mansari di ahu, so porlu pangurupion manang sian ise pe” termasuk ma sian Debata nidokna disi. On ma kemerosotan iman, jala tu angka jolma sisongon on ma marlulu Debata Jahowa, pola mamangke sulu unang adong na terlewathon.

Ndang tarbahen jolma malua sian sere manang perak

Molo di pengadilan, sai tabege do barita boi lolos sahalak parjahat (manang koruptor) sian jeratan hukum ala ni sinamotna. Ai na boi do disuap jolma, alai ianggo Debata nda tung boi. Sandok, kemapanan hidup sian sinamot ndang boi paluahon jolma sian rimas ni Debata. Kemapanan ni haporseaon do na boi paluahon jolma, na mangonjar tu hamubaon ni roha. Kemapanan haporseaon do na umarga sian kemapanan ekonomi, nang pe ringkot situtu ekonomi ni jolma, alai laos boi do i paagohon haporseaon. Hape di Tuhan i, ndada ekonomi ni sasahalak ni binerengNa, haporseaonna i do.

Mangarade di ari paruhuman ni Jahowa

On ma Minggu parpudi andorang Ujung Taon Parhuriaon. Di Kalender Gerejawi manang na Tahun Liturgi, on ma minggu parpudi di pangaradeon ni na porsea manomunomu ujung ni angka ari dohot partingkian. Naeng ondolhonon di jamita sadari on paboa marujung do angka ari dohot partingkian di portibi on. Ndang adong na manongtong di portibi on, holan Debata Jahowa do na manongtong. Alai adong do parhiteanta songon jolma na fana on tu hadirion ni Jahowa na manongtong i, i ma haporseaon. Haporseaonta i do na mamboan hita pajumpang jala mardame tu Debata Jahowa, ndang perak manang sere. Haporseaonta i do nang na mangonjar rohanta marhamubaon ni roha, i do na hinalomohon ni roha ni Debata sian hita jolma pardosa on. Haporseaonta i do na paluahon hita sian rimas ni Jahowa tu sandok tano on, huhut na paluahon hita sian haroro ni ari parpudi i. Marujung pe angka ari dohot partingkian i alai ianggo haporseaonta i diboan i do hita mamolusi i, menembus ruang dan waktu. Ala ni i, pangaradeonta manomunomu ari pangarimasan ni Jahowa i ma, tatiop ma gomos haporseaonta i, songon na didok di Pang. 3:11, “Magira ma Ahu ro. Tiop ma na di ho, unang adong na mambuat tumpalmi.” Haporseaonta i do muse na mangajarhon tu hita mangulahon lomo ni roha ni Debata, huhut pasidinghon sogo ni rohaNa i.

Hahonaan ni jamita

Bangso ni Debata do hita

Jonok nama ari ni Tuhan i, alai unang pola tasungkun sadiharina, Debata Ama i do na umboto i jala na berhak secara total disi. Dohot pandohan na asing, ndang na ro di hita i, ndang adong hakta mangantoi i. Holan on do, tahalungunhon do harorona i. Debata Jahowa do na berhak secara total disi, tapuji ma Ibana na songkal jala na marmulia, jala sian pamujionta i do tartanda paboa bangsoNa do hita.

Pauba roham saonari

Marhitehite kesadaran bahwa ada akhir dari seluruh zaman, tapature ma ngolunta i. Unang marpaima jo, alana boi do manang sadihari portibi on manaiti rohanta i. So tung tadok muse di bagasan rohanta, “Ndang adong na denggan, manang na jat bahenon ni Jahowa.” Tabolongkon ma parange na so denggan, parjujion, korupsi, na maniopi upa ni parkarejonta, pasudasuda tingki tu na so marguna, na so mangalehon perhatian tu keluarga, na manghosomi dongan, dohot lan na asing dope ulaon na so dihalomohon Debatanta i.

Sipahusorhusoron

1) Ala bangso ni Debata hita, las ma rohanta manomunomu ari ni Tuhan i, ai haluaon do i di hita, songon halalas ni roha ni halak dina laho manjalo hadiah songon pandohan ni apostel Paulus di Plp. 3:14, “On do tahe: Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i.” Di Alkitab, Flp. 3:13b-14, “tetapi ini yang kulakukan: aku melupakan apa yang telah di belakangku dan mengarahkan diri kepada apa yang di hadapanku, dan berlari-lari kepada tujuan untuk memperoleh hadiah, yaitu panggilan sorgawi dari Allah dalam Kristus Yesus.”

2) Di halak na mabuk, songgotsonggot do ari ni Tuhan i, alai di angka na porsea i ndang. Ai molo panangko borngin na hatiuran, tarsonggot do rohana jala ndang tarbahen be laho maporus. Alai angka na di bagasan hatiuron do hita, nda tung na hatiuran. I ma jamita di Epistel ni Minggu on, 1 Tessalonik 5:1-11. Siala ni i las ma rohanta paradehon diri.

3) Unang marpaima jo, saonari tamulai ma maninggalhon angka pangalaho na hurang denggan di jolo ni Tuhan i, ala marujung do ngolu ni jolma, binsan margogo dope hita mangalo dosa i, so tung sanga gabe bangko manang karakter na so tarpalongkang hita be.

oooOOOOooo


Ujung Taon Parhuriaon, 23 November 2014

Johannes 11 : 25 – 26
Jesus do haheheon dohot hangoluan

Patujolo

Sahat ma hita tu Minggu Ujung Taon Parhuriaon. Sada hal na menonjol di Minggu on i ma, dijahahon do goar ni angka na monding di bagasan sataon huria i. Laos i do umbahen digoari minggu on songon minggu parningotan di angka naung monding. Sipata ro do tu bagasan roha, boasa ringkot jahaon i begeon ni na mangolu? Molo dohot do goarhu dijahahon disi, hubege dope i? Dibahen i, boasa pola ringkot begeon ni na mangolu goar ni angka naung monding i? Nda na mangarungkari sidangolonon i?

Hatorangan ni turpuk

Ro do angka na sinuru ni si Maria dohot si Marta mandok tu Jesus na marsahit si Lasarus. Ro alus ni Jesus: “Nda tung hamatean ujung ni sahit i, alai bahen hasangapon ni Debata do i, asa marsangap Anak ni Debata marhite sian i” (ida Joh. 11:3-4). I do tutu, saluhut na masa di ngolu ni jolma, ingkon tu hasangapon ni Debata do tutu halahoanna i. Isara adong halak na mapitung sian hatutubuna dope, disungkun angka siseanNa ma Jesus, ise do na mardosa umbahen na ingkon mapitung ibana sian hatutubuna dope, ibana sandiri do manang na natorasna (ida Joh. 9:1 du). Alus ni Jesus tu angka sisean: “alai naeng gabe patar angka ulaon ni Debata di ibana” (ayat 3). Songon i nang di hamamate ni jolma pe, papatarhon huaso ni Debata do i, hasongkalon dohot hatigoranNa.

Boasa didok songon i? Jala boasa ingkon mate jolma i? Di mulana i, ndada tu hamatean disangkapi roha ni Debata dina ditompa Ibana jolma i, asa mangolu do tahe, asa tu hangoluan i (ida 1 Musa 1-2). Alai ala ni dosa ma, ingkon mate ma jolma i (ida 1 Musa 3). Alai ala ni holong ni rohaNa na balga jala na bagas i, dipajongjong do hita laho paluaonNa. Songon na nidok ni apostel Paulus di 1 Tes. 5:9 i, “Ai ndang dipadiri Debata hita bahen sirimasan; alai naeng ma dapotan haluaon hita marhite sian Tuhanta Jesus Kristus.” I do sangkap ni Debata marsuru AnakNa, asa mulak do hadirion ni jolma manisia songon di mulana i asa dapotan hangoluan. Alai ianggo racun ni dosa i nunga sanga masuk tu ngolu ni jolma i, manang beha pe ingkon mate do, alai ndada i be ujung ni ngolu di angka na porsea i. Nunga dipatalu Tuhan i hamatean i, songon didok di 1 Kor. 15:55, “jo hamatean, didia soropmi?” Asa, ndada hamatean na saleleng ni lelengna be hamatean ni angka na porsea i, parsatongkinan do paima dipahehe Tuhan i muse jala dilehon hangoluan na saleleng ni lelengna i. Persoalanna, “porsea do ho disi?” (ayat 26).

Hahonaan ni jamita

Hasangapon ni Debata

Dijahahon pe goar ni angka na monding di huria i, ndada na mangarungkari sidangolon, alai asa idaonta do hasangapon ni Debata marhitehite hasusuda ni bohal ni jolma. Marujung do ngolu ni jolma, ndang manongtong songon Debata. Ringkot do i botoon ni na mangolu songon hita on, asa hita pe mangarade ma di hasusuda ni bohalta be. Sian angka na jinahahon i, adong ma i na marujung ala ni parsahiton naung leleng, adong do nang na marujung di bagasan tingki na jempek, bahkan tompu isara na tabrakan dohot na asing. Na manungguli haporseaonta i do i, asa unang olo hita marpaima jo laho paubahon roha. Manang sadihari pe na boi do ajal menjemput. Hagogoon ni jolma, hamoraonna i, ginjang ni rohana i, talu do jala mago do muse, hasangapon ni Tuhan i do na monang jala na manongtong.

Jesus do haheheon dohot hangoluan i

Jesus Kristus, Anak ni Debata, i do haheheon dohot hangoluan. Manang ise naeng di ibana hangoluan i, ro ma tu Jesus, haporseaon ma tiketna tusi. Taboto do ianggo haheheon i dohot hangoluan i sijaloonta do i dung mamolus hamatean hita jala dung ro ari parpudi i. Alai sasintongna nunga bongot tu portibi on haheheon dohot hangoluan i, i ma marhitehite Tuhan Jesus. Lapatanna, nunga menembus ruang dohot zaman be haheheon dohot hangoluan i, nunga ro tu tongatonganta di bagasan Jesus Kristus. Marhitehite pangantusion i, boi ma dohononta paboa sasintongna tondi ni haheheon dohot hangoluan i nunga sahat nuaeng di tingki on tu hita. Persoalanna, tajalo do manang na ndang. Sadari on do, di tingki on jala di ingananta di portibi on, penentuan ni hangoluan i di hita. Molo tajalo do haheheon i dohot hangoluan i marhitehite na manjangkon Tuhan Jesus tu bagasan ngolunta i, naung tajalo ma i hangoluan i. Ala ni i do, las ma roha ni halak na mangolu di bagasan Kristus, na mangolu mangihuthon angka ajaran ni Tuhanta i, mangolu do ibana nuaeng nang sogot.

Minggu Ujung Taon Parhuriaon = Minggu Hatongtongon

Digoari do nang minggu ujung taon parhuriaon on dohot minggu hatongtongon, manang minggu kekekalan. Ala dison ma dijamitahon taringot tu kekekalan di bagasan Tuhan i. Naeng gabe jamita taringot tu panghirimon ni angka na porsea i ndang marisuang, marujung tu hangoluan na salelenglelengna do. Songon hata ni Tuhan Jesus di ayat 4 i, “nda tung tu hamatean ujung ni  sahit i” songon i nang di angka na porsea, nda tung tu hamatean ujung ni parngoluanna i, tu hangoluan do dung dipahehe Debata ibana. Dibahen i, sai olo ma hita porsea paboa di bagasan Jesus nunga tajalo haluaon i, dung dipahehe hita sian hamatean parsatongkinan i, dipangolu tu hangoluan na manongtong i rap dohot Ibana, Debata Ama dohot Tondi Porbadia. Tu angka jolma na mangolu do ringkot botoon on, nda tung tu angka naung monding i. Ala ni i, dina dijahahon goar ni angka na monding i, laho di hita do i manungguli haporseaonta sai anggiat olo hita mangarade di bagasan hamubaon ni roha.

Sipahusorhusoron

1) Porsea ma hita, Jesus do bona ni haheheon dohot hangoluan. Di bagasan ibana do tajalo haheheon i dohot hangoluan i, jala ndang tarhahua ni hamatean i hita molo di bagasan Jesus hita (pat. Rm. 8:38).

2) Molo porsea do hita taulahon ma lomo ni rohaNa i, i do na patuduhon paboa na porsea hita (adong haporseaonta). I do didok di jamita Epistel, Hes. 34:20-24, Debata sandiri do na laho manguhumi hita hombar tu na taula saleleng mangolu, manang na adong holong manang na ndang. Alai hombar tu 1 Tes. 5:9 i, orang Kristen ada bukan untuk dihukum, melainkan untuk menerima keselamatan.

3) Di Minggu Ujung Taon Parhuriaon on, manang di minggu parningotan di angka na monding, taingot be ma ari hamamatenta be. Populer do on di bagasan pandohan “memento mori” manang ingot ari hamamatem. Dohot tujuan, tontu sahali asa mangarade hita manomunomu i di bagasan haporseaon na hot tu Tuhan. Magopona i molo ingkon tu uhuman do hita laho dung mate hita, ndang tu hangoluan naung pinarade ni Tuhan Jesus i.

oooOOOOooo


Advent I, 30 November 2014

Jesaya 64 : 1 – 8
Jahowa do Ama di hita

Patujolo

Sahat ma hita di Minggu Advent, parmulaan ni taon na imbaru di kalender ni huria. Sada parmulaan na imbaru, ingkon do i marisihon angka na denggan, na uli jala na hasea. Asa denggan muse prosesna i di pardalanan ni tingki na mangihut jala denggan nang ujungna. Songon di turpuk jamita di Minggu on, mulak do muse bangso Israel tu na hinaporseaannasida sian na robi dope, tu credo na pita paboa bangso ni Debata do nasida jala Debata do Ama di nasida. Alai marbungkus pujipujian dohot panopotion ni dosa do, gabe tung mansai uli do Jesaya 64 on jahaon songon sada puisi/sajak na niendehon. Alai taida ma jolo, boasa gabe Jesaya 64 on na ingkon gabe turpuk jamita di Minggu Advent I, parmulaan ni taon na imbaru di huria.

Hatorangan ni turpuk

Sian Jesaya 64 on, taida do panindangion ni bangso Israel taringot tu Debata Jahowa. Na gok huaso do Ibana, jala pargogo na so hatudosan, no molo pola patuduhon diri manang na tuat Debata sian banua ginjang, angka hitir do bangso parbegu maradophon i. Dipangke do pandohan “Aut ni haru diribahi Ho angka langit” na paboahon haporseaon do i na manghatindanghon taringot tu Debata pargogo na so hatudosan i, na marhuaso di langit nang di tano on.

Kesadaran nasional

Sian Jesaya 64 on taida do na adong kesadaran secara nasional. Di parmingguon do dijahahon psalmen on, lapatanna dijahahon secara bersama-sama angka na ro tu parmingguon i. Dohot pandohan na asing, adong kesadaran secara bersama-sama, na parjolo bahwasana Debata na songkal jala pargogo na so hatudosan do Debata Jahowa. Na paduahon, mandok paboa naung lemba do nasida di credona i, ndang dihangoluhon be haporseaonna i. Umbahen pola nasida sandiri na mandok, “na ramun do hami d.u.” di ayat 4-6 i.
Ndang pola dipatorang dison manang na ala ni aha gabe muncul muse panindangion on, dung “mansai leleng” (ayat 4) nasida mangolu di bagasan dosa. Alai huhut na patuduhon paboa (jala somalna) adong na masa di tongatonga ni bangso i umbahen ro nasida tu jolo ni Debata marhite psalmen on. (Adong na mandok, hoihoi ni bangso i do na mangonjar nasida manjou goar ni Debata.) Dung pujipujian (ayat 1-4a), panopotion ni dosa (ayat 4b-6), ro muse panindangion na penuh percaya diri mandok dirina bangso ni Debata (ayat 7-8). Sada rangkaian na mansai uli do on di tonga ni bagas joro i.

Percaya diri gabe bangso ni Debata

Ra deba mandok, molo diula sahalak sadasada hasalaan, ndang patut nian ibana pajojorjojor hadirionna. Isara rupani sahalak presiden mandok, “ai presiden do ahu, ala ni i sesa hamu hasalaanki.” Alai ianggo di hubungan keluarga, sai adong do na songon i: “Sesa ma dosangki, bapa, ai anakmu do ahu.” Songon i ma taida nuaeng parsaoran na rosu antara ni bangso ni Debata tu Debata sandiri. Songon hubungan ni sada ama tu anakna. Alai huhut taida disi, na adong do haporseaon ni bangso i umbahen na barani nasida mangidohon hasesaan ni dosa. Porsea do nasida sian pangaramotion dohot panumpahion ni Debata Jahowa na sai laon, tutu do Debata Amanasida. Kepercayaan diri sisongon on ndang jumpang di halak na so marhaporseaon tu Debata. Umumna molo ro parungkilon manang na dosa diula sasahalak, ro do tu jolo ni Tuhan i mangido hasesaan ni dosa, i ma tandana mangolu dope haporseaonna. Alai laos adong do halak na maila ro tu jolo ni Tuhan i manopoti dosana, gariada lam mandao do sian ngolu haporseaon i, sekali basah ya sudah mandi sekali, ninna molo di ende i.

Parmulaan na denggan

Molo tapaihutihut barita ni anak na mago na di Mat. 15:11-24 i, gabe denggan do muse dung adong panopotion sian anak na mago dung hamumulakna tu jolo amana i. Songon i nang di hita, ingkon jolo adong do panopotion ni dosa asa denggan muse parngoluanta di jolo ni Debata. Asa tu panopotion i, ingkon jolo adong do panandaon diri asa unang panopotion i holan formalitas sambing. Molo porlu, tapajojor di bagasan tangiangta i angka dosa dohot hasalaanta i, tau paposhon roha do i. Adong do halak na mardenggan tu donganna marhitehite na manabunihon hasalaan. Lapatanna, dung na so masipangkulingan nasida ala ni sadasada persoalan, mardenggan do muse alai ndang hea masipatangkasan manang masipatorangan taringot tu persoalan i. Naung salpu i salpu ma, denggan do nian i, alai dao dumenggan molo masipatorangan jala masiakuan kesalahan. I do permulaan na sempurna. Songon bangso ni Debata di turpuk on, dipajojor do hasalaanna na sai laon asa tung puas jala ndang adong na buni di adopan ni Tuhan i.

Hahonaan ni jamita

Panandaon di Debata

Molo naeng hita mamungka lembaran baru di ngolunta on di bagasan Tuhan i, sai jumolo ma hita mananda Ibana. Ise Debata na tatanda? Laos i ma muse ojahanta laho marsaor dohot Ibana. Debata parasi roha, perdenggan basa, na lambat tarrimas, pargogo na so hatudosan, na lomo roha di hamumulak ni parjahat, dohot lan angka na asing, angka i ma na gabe ojahan di hita marsaor dohot Ibana.

Advent I, simbol parousia

Dung minggu ujung taon parhuriaon, simbol ni haporseaon ni halak Kristen paboa na marujung do sogot saluhutna jolma, ro ma Minggu Advent I. Advent lapatanna “kedatangan,” molo tapahembang muse pangantusionna i na marlapatan penantian ni angka na porsea i do di haroro ni Kristus na paduahalihon i (parousia). Jala haroro ni Kristus na paduahalihon i disimbolhon do muse di ari Natal (ari hatutubu). Ala ni i, minggu Advent naeng mangajarhon tu hita asa di bagasan hasatiaon ma hita maimaima Kristus i ro paduahalihon. Satia ma hita di haporseaonta i, jala satia ma hita mangulahon na hombar tu haporseaonta i.

Advent: joujou tu hamubaon ni roha

Suang songon i minggu Advent manjouhon angka jolma tu hamubaon ni roha. I do pangaradeon laho manomunomu Kristus, di bagasan haserepon ma dohot hahohomon. Di liturgi ni angka huria Lutheran, digonti do ende sambutan Haleluya tolu hali i dohot Hosiana tolu hali. Lapatanna asa marsitutu huria i laho pahusorhusor (meresapi) masa penantian on di bagasan haporseaon na sintong. Molo dijouhon i, taboto ma na jonok ne ma haroro ni Tuhan Jesus na paduahalihon i. Asa, bergerak ma angka bangso i tu hamubaon ni roha.

Sipahusorhusoron

1) Mulak ma hita tu panindangion na pita tu Debata Jahowa.
2) Marhitehite perenungan di Minggu Advent on, tatanda ma dirinta dohot hadosaonta i, dung i tatopoti ma di jolo ni Tuhan.
3) Tasuanhon ma di bagasan rohanta be, Debata do Ama di hita, jala hita bangsoNa. Siala ni i, marparange ma hita hombar tu lomo ni roha ni Debata dohot aturanNa.

oooOOOOooo


pinatomutomu ni Pdt. Mikhael Ofel Panjaitan